港足前晚響亞盃外逼爆旺角大球場，仲憑強橫鬥志加埋出色防守，由「得分守衞」陳偉豪頭槌1:0絕殺越南。足總高層今次好識做，除獎金加碼外，仲準備提前同署理教練金判坤傾續約，如無意外，金sir下個月就會坐正。
世界排名159位嘅港隊，上場作客守和烏茲別克，球員只得500蚊和波獎金。事件曝光後俾球迷鬧爆，足總即刻重新制定獎金制度補鑊；而我求大俠收到風，足總高層前晚賽前決定加碼，落場球員嘅贏波獎金由4,600蚊加到8,000蚊。最終贏到排名高佢哋30位嘅越南，球員梗係開心，唔少球迷賽後都希望足總快啲同署理教練金判坤續約。
其實鳳凰計劃早就開咗綠燈，政府同足總傾好，港隊總教練唔使再經全球招聘呢個程序，只要金判坤響6個月合約期交到成績，就有機會升正。足總今次反應好快，早就諗住續約；主席梁孔德噚日證實，足總CEO薛基輔今個禮拜就會同金帥坐低傾續約細節，只要傾妥條件，再經下個月嘅董事會通過，金帥就可以升正，任期去到2014年。
以港隊嘅實力同排名，相信冇乜人諗到對住烏茲別克同越南可以攞到4分，仲要排第2位；當然，正如金判坤同隊長陳偉豪賽後所講，距離出線去澳洲決賽周嘅目標其實仲好遙遠，但總要有創造歷史嘅希望。越南教練洪雲標賽後亦讚港隊，話同佢哋上年作客2:1贏嗰隊港隊相比，的確有好大進步。
下仗料續用旺角場
前晚重建後嘅旺角場首次爆棚，10月主場對阿聯酋就肯定有更多球迷爭住入場；據聞場波暫定繼續響旺角場踢，至於會唔會改返去香港大球場，足總高層就唔排除呢個可能，不過普遍球迷認為旺角場會比較利穩守突擊嘅港隊發揮。
球迷想睇港隊，最快要到6月嘅國際賽賽期，對手仍然聯絡中，但多數會係東南亞同西亞球隊；而到時陳肇麒、梁振邦同高梵等外流中甲嘅港腳會唔會歸隊，足總就話會同國內球會加強溝通喎。