【興趣所在】
講有關鄉議局的事，林偉強小心翼翼，一輪嘴遊花園，講屋企人更立刻「閘住」，因此甚麼江湖飯局、坪洲敗選、女兒緋聞，未開口已被封口。惟獨名錶收藏，他樂於分享，特地從保險箱精選部份寶貝，在富豪飯堂book埋房給記者拍照，不過全程金睛火眼，生怕我們弄花。
全盛時期擁逾二百隻
他極度錫錶，「就好似有人鍾意寵物，有人鍾意名牌衫。我好怕整花手錶，着件靚衫上身，都要乾乾淨淨、貼貼服服啦，遇上天熱大汗，我唔會戴錶。」離島富二代的他，六十年代開始玩錶，全盛時期有二百多隻，如今尚餘數十，「好耐之前諗過移民，所以賣咗一部份，而且每隻錶我都親自打理，沒有假手於人，好花時間。」
林偉強玩錶，不理升值潛質、精細科技，純粹貪靚貪好玩，「唔一定好貴，有些幾百蚊都好得意。六、七十年代幾萬蚊買隻錶已經算好貴，近年簡直就是天價，動輒一百幾十萬，𠵱家心態唔同，已經買少好多。」他眼內的四大名錶：江詩丹頓、愛彼、伯爵、柏德菲臘，至愛江詩丹頓，愛彼、伯爵錶有不少，但從未買過柏德菲臘，唔啱眼緣。