二十六夜，熱力在四射，銅鑼灣行上啲那大場肉香滿瀉，八國聯軍everybody玩到是夜不是夜；至於那旺氣落返啲嘅細場，足球隊唔該借歪反而造就爆滿之奇蹟，6,000幾人「北漏洞拉」一齊佔領球場飛卜洗版，唔同你爭銅鑼灣。
有飛砸袋，見到未能入場嘅人頭湧湧先冇咁腳軟，還是目睹排隊買飛到截人到拉閘到扯紅旗，多得一位熱情但遲到的朋友拖延，焗住響門口見證一個個遲來球迷的興緻勃勃到失望木獨嘅表情，其中有一位老竇左手拖5歲阿仔，右手拖4歲阿女彈住咁往球場跑去時，我不忍想像不久之後佢哋一家三口望門興嘆嘅冇癮，當時真係有啲想將褲袋裏面張飛拱手相讓……「小朋友，你攞去啦，叔叔不行了，香港球壇未來靠晒你哋嘞！」諗係咁諗，但係雙腳卻不由自主地逃離現場往便利店逃去，本來想搵附近嘅懷舊快餐店幫襯下，但響對面海丹麥餅店摺埋之前，花墟道已經冇晒有食物供應嘅店舖，除非你肯買花，想當年球場門口有睇波飯盒套餐賣，鬼咁方便，「仲想當年？2015亞洲盃都就到啦，仲唔入場等咩呀！」遲到先告狀，咩世界。
入場，熱鬧，不過又係冇當年爆棚咁熱鬧，一來座位少咗，二來坐得隔涉咗，以往若果坐爆，場邊都企2、300人成個街場咁，家陣排排坐乖得很但又有點太斯文，粗口人唔係冇，但可供佢發揮嘅機會唔多，而龐大嘅打氣團係勁，但瞌埋眼仲以為去咗外國，因為嗌英文多過廣東話。
睜開眼睇波，越南隊其實幾好，中場好霸道，鬥搓香港隊冇乜着數，好在後防夠man勁有安全感，而左右兩隻快馬都夠落力，引到大家喊破喉嚨，這一晚，愛港之人都在旺角場。
上半場，互交白卷；下半場，漸入佳境，麥基實在幾出色，除了射門之外乜都做得到；威廉乾塘，仲有康廉頂上繼續快放，加上越南朋友個個細粒，死球除咗係史篤城嘅強項，亦係香港隊嘅殺手鐧，果然康廉博罰，張峰斬中，偉豪妙頂，完場前唔知幾分鐘，1:0，型！突然之間支持香港隊就變咗一件好型嘅事，原本斯文嘅球迷都一起森巴舞，臨走時我feel到，這晚只是起步，下場波，請早啲到旺角場報到，我那位遲到的朋友。
keyman
now TV主持
mailto:[email protected]