身為內地一姐嘅范冰冰前日聯同幾位香港藝人林家棟、陳豪及女友陳茵媺，到深圳出席時裝活動。范冰冰收起性感，着件大褸到場，據知原本壓軸行紅毯嘅冰冰因大會安排失當提早出場，搞到冰冰唔高興仲扭計唔接受訪問。
家棟中頭獎見紅
而嚟睇騷嘅嘉賓林家棟不慎「中頭獎」，慘被天花嘅一口螺絲跌中佢頭頂，點知佢一摸額頭先知道流血，受傷部位更腫到乒乓波咁。不過家棟冇即時離場，整完傷口後繼續睇騷。
此外，陳豪同女友陳茵媺齊齊做訪問，佢隻手全程放係女友腰間，又望住女友甜絲絲話：「對上一次一齊出席活動都一段日子啦，所以今日好開心。冇一齊行紅地毯唔緊要，𠵱家見到就得啦。」仲攬一攬女友腰，𠱁得女友甜笑，原來佢哋行紅地毯時，記者稱佢哋做陳生、陳太，事後陳豪笑話：「我聽到呀，已經更正咗係陳先生、陳小姐。」
撰文：馮仁昭
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/