巴神嚟料，雷神都要行埋一邊。意大利國家隊喺星期四飛去瑞士友賽巴西，航行途中遇上畀雷劈中險象，大難不死果然有後福。意大利喺場波半場落後巴西，結果憑迪羅斯破蛋，加上巴洛迪利嘅世界波扳平，各二言和。
世界波逼和巴西2:2
巴西由費特同奧斯卡杜斯山度士分別喺33同42分鐘入波，半場領先意大利兩球。易邊後意大利變陣出擊，換入艾沙拉維同埋阿利斯奧施斯轉打4-3-3，結果好快就有成效，迪羅斯喺54分鐘接應角球近門破網；3分鐘之後，巴神喺離門25碼攞到波之後起腳施射，死角入網，以呢球世界波收死巴西門將施薩索拉斯。雖然自從82年世盃決賽周次輪分組賽3:2贏巴西之後，到今時今日都依然未再贏過森巴兵團；但今仗可以喺落後兩球情況下扳平，算有交代。
意大利教練柏蘭迪利賽後對藍軍嘅表現非常滿意：「上半場連輸兩球之後，形勢上我哋似乎玩完，但班波真係鬥志十足，尤其係巴洛迪利入嗰球，實在非常精采，佢仲為隊友製造咗唔少機會。」意大利踢完呢場熱身賽，馬上就要備戰下星期二對馬耳他嘅世盃外圍賽。
巴神喺1月由曼城轉投AC米蘭，人氣返晒嚟，今場波為意大利建功後，佢喺2013年為球會同國家隊一共上陣7場入8球，認真唔簡單。柏蘭迪利亦曾講過見到巴神自從返嚟意大利之後人都開心晒，好似變咗另一個人咁。意巴戰賽前亦有唔少人討論兩隊嘅新世代前鋒巴神同埋對家嘅尼馬邊個勁啲，單計今場波梗係巴神搶晒鏡，連尼馬喺賽後都話服咗佢：「我一直係巴神fans，佢唔單止係出色球員，亦係大好人。今場波其實巴西表現唔算差，大家應該睇到我哋一直進步緊。」