政府近來推出的所謂「穩定樓價的新措施」，幾近癱瘓了二手樓的成交。聽說高檔豪宅類，最首當其衝，成交每況愈下。前幾天，我與地產經紀友人通過電話，跟他聊一聊對後市的看法，佢一針見血的說：樓市成交宗數，無疑會驟降不少，但又不是無成交，只是全部歸邊。係人都知亞媽係女人啦，成交宗數少不是重點，究竟歸邊向哪邊，才是關鍵所在！我當然要「打爛沙盆問到篤」。 友人吞吞吐吐，最後拋出一句：大劉與細劉囉。吓，又關華置事？原來佢意思係大「樓」與細「樓」，會成為唯一有一線生機的類別。由於，措施無針對上車一族，細樓當然仍有市場。咁細樓會好賣我明嘅，但可解大樓仲會有人買呢？他答道：是「假大樓，唔係真大樓喎！」他續說因為六個月期間內換樓都有得豁免DSD，其實有好多客仲想 upgrade去三房單位，但因現時呎價太高，所以多一個廁所都 afford 唔到，所以三房一廳建築面積七、八百呎的單位，會好搶手。啲客會叫家傭小孩睡同一間房，主人就第二間房（無套廁），最後第三間房暫時做書房或衣帽間，第日小朋友大咗就畀佢用囉。嘩，八百呎都間成三房，相信個客飯廳大極有限，唔怪得知佢話「假大樓」啦。
在我心目中甚麼size的樓宇是細樓。我會說是實用三幾百呎以下的樓宇都當做細樓。我的地產經紀友人，又真係講得好「中」，近排有好幾個八十後朋友仔， 都買咗或準備買細碼上車盤。另一邊廂，大個啲嘅六七十後，就勁想搵三房，但堅持要買新樓，雖然明知實用率低。不約而同地，他們都問我在狹窄的居住環境之下要買甚麼樣的家具，又「骨子」又「型仔」呢？但同時，佢哋先聲明唔想放「cheap嘢」。但上網做定功課睇啲新樓嘅layout，發覺個廳連兩米（六呎半）梳化都放唔落呀，救命！
歐洲的家具中，要搵張又細又靚的梳化，都幾蝦人。但我心目中多年來都有一張不二之選：Poeten Sofa（又名 Finn Juhl Sofa）是也。其闊度只有136cm（四呎六吋），深度僅80cm （三十二吋）。 其實在1941年，Finn Juhl設計此梳化，無諗過用來賣錢的，他只是為自己新居入伙而度呎打造的。相信他估唔到這會成為他最recognised的設計之一。真係無心插柳柳成陰。無疑，論知名度，Finn Juhl在丹麥的設計界比不上Hans Wegner。而主因是他設計的free form形態太radical（激進），低調的北歐人認為他的design太怪雞看不慣。其實，我第一次在九十年代見到此梳化relaunch，都不太欣賞其proportion，肥肥矮矮，corner 少少的起牛角。今天，再看卻出奇地順眼，唔知係咪比Philippe Starck、Jamie Hayon等 train到對眼，唔重口味唔like。但Finn Juhl設計來襯Poeten的單座Pelican Chair的外形到今時今日我都係接受唔到囉！
對於比較喜歡contemporary而唔太接受retro的朋友，我會提議你買Vitra的Suita Club Sofa。Size方面，其闊度只有170cm（五呎七吋），深度比起Poeten Sofa更淺，僅72.5cm（二十八吋半）。最為港人喜愛的高頭枕是此梳化的可選購的option，但注意加頭枕就會令梳化闊度加多幾吋。值得一提這款sofa的設計，源自B & B的Maxalto line御用設計師Antonio Citterio的手筆，但Vitra價錢平Maxalto 一半有多，絕對親民。
但如果你嫌Vitra都out of budget，則不妨考慮買Stellar Works的Lunar Sofa。萬頭的價錢買到丹麥的Space Cph設計，珍珠都無咁真，皆因Stellar Works此日本及法國財團在上海成立了生產基地。其闊度只有160cm（五呎三吋），深度71cm（二十八吋左右）。有老人家一起居住的朋友至為適宜，因為坐位離地頗高，長者坐後站起來比較容易。
作者：招國偉@aluminium（mailto:[email protected]）