「心女」離開舊經理人公司，泊到個好碼頭，加盟咗一間國際性公司，仲做埋一姐㖭，表面睇就威威水水，但其實喺大公司裏面，一姐係冇話事權㗎，乜都要聽公司同事嘅說話，以前心女仲喺細公司時，好多嘢都係自己顧自己，所以同記者接觸得多，關係都好好，得閒仲會煲吓電話粥，尤其係記者要問佢回應時，一打畀佢就聽電話，鬼咁合作。點知過檔新公司後，大公司有大公司嘅制度，佢連聽記者電話回應問題，都會畀公司鬧餐懵，搞到唔敢再隨便聽記者朋友電話，令大家關係都疏離咗，難怪佢見到關仁都呻兩句，話簽大公司真係有得有失，雖然話樹大好遮蔭，但藝人同記者始終互惠互利，𠵱家搞到關係差咗，對自己冇好處，惟有希望大公司真係可以捧紅自己上位啦。
撰文：關仁
想睇更多首輪猛片介紹同預告片？《一台戲》為你網羅最新電影介紹及影評↓↓↓↓
http://hk.movies.nextmedia.com/