一提起電器大王，大家都諗起前幾年過身嘅信興集團主席蒙民偉。唔經唔覺，信興集團今年成立60年，電器大王第二代傳人、集團副主席蒙德揚（David）噚日話，集團為慶祝60周年，以「承信興家」為主題。佢噚日用咗老爸嘅蒙氏咖喱牛腩飯宴客，同場食家李純恩心急到要求提早上菜；社署署長聶德權都食到舐舐脷。
David話，蒙氏咖喱牛腩飯同集團一齊成長，話說34年前老爸去神戶傾生意，當地一個印度朋友教佢整，再加以改良。「我幫佢切洋葱切到標眼淚。」既然承信興家，佢話𠵱家着手構思，唔用咖喱撈牛腩，改用拼生果，「𠵱家唔少人食齋嘛。」八方探吓秘方，佢賣關子話：「一定唔可以用西瓜。」