港產女小丑稱霸全球！13名港產小丑上月尾出戰馬來西亞舉行嘅《世界小丑錦標賽2013》，成績斐然，橫掃11個大獎！女小丑龍衍彤，擊敗歐美、亞洲過百名小丑，成為首名封后嘅華裔女小丑！
30歲嘅龍衍彤入行10年，稱號「小丑吵吵」，佢話至勝之道係「夠嘈」。「我比較有活力，而且配合背景音樂節奏，比起主力演默劇嘅外國選手，更能帶動現場氣氛」。佢仲夥拍四名港產小丑參賽，包括有「香港小丑王」之稱嘅吳浩賓，組成《爆吉戰隊》，勇奪「隊際趣劇演出」亞軍㖭！
全職做小丑同搞event嘅佢話，拎咗獎亦唔打算加價，平均一個月都有2萬蚊收入，算唔錯。佢仲希望可以參與更多慈善工作。稱霸全球都唔會利字當頭，抵你做女王啦。