奧雲宣佈季尾掛靴。最可惜是他此刻宣佈掛靴，似未必人人都覺「可惜」。近季屢遭傷患折磨，本季在史篤城有冇入球都未必個個答得出（1球，1:3敗給史雲斯一役）。由上季曼聯不跟他續約開始，相信很多人都認為他離掛靴不遠。
自06年世盃嚴重膝傷，奧雲仔一直未能重返頂峯。上季在曼聯有份踢的比賽，5隻手指數得晒；但他的大賽球員風範，於09年曼市打吡反勝4:3，以及2010年聯賽盃決賽的入球，仍表露無遺。球迷都慨嘆：上天既然給他如此天分，為何同時要給他傷患纏身？
提起傷患與「奧雲」，必會想起名字都叫「奧雲」的夏格維斯（Owen Hargreaves）。兩年前他長唞後首次正選，竟踢了6分鐘便自行步離球場的畫面，依然歷歷在目。無人否認他是08年曼聯重奪聯賽和歐聯的功臣；可惜他留給曼聯球迷的印象就只有這季。現於QPR跟操，哈利列納在護級深切用人之際，都不願給他一份正式合約。
幸好兩位「奧雲」都不愁後路。夏格維斯表明不考慮到低組別聯賽，大不了去做傳媒人或教波。貴為英籍球員中第2富有的奧雲，形象健康靚仔，名牌廣告接唔完，而且投資有道，據聞坐擁4,000萬鎊身家，仲有自己的馬房。已經好過那些因傷掛咗靴，你都唔知的球員了。在奧雲展開退休大亨生活前，球迷要留意今季史篤城餘下比賽了，睇一場少一場喇！
方柏翹
now足球評述員