英格蘭領隊鶴臣今次真係咩面都冇晒！前兩日里奧費迪南話要治療背傷，踢唔到國家隊，鶴臣冇同佢計較，仲話英格蘭未來都會選里奧，相當大方；但里奧就冇理過鶴臣感受，趁唔使比賽，竟然坐長途機去卡塔爾講波，仲要講番英格蘭作客聖馬力諾呢場！
來回坐15個鐘飛機
英國《每日郵報》爆料，34歲嘅里奧將會飛去卡塔爾嘅多哈，幫卡塔爾半島電視台講波，旁述英格蘭作客聖馬力諾場世盃外。里奧之前話背傷未斷尾，要接受曼聯幫佢一早安排好嘅治療同訓練，但轉頭就去多哈，坐長途機來回要成15個鐘，唔通坐咁耐飛機又對背脊好咩？里奧今次真係擺明剃鶴臣同英足總眼眉。
卡塔爾半島電視台體育部主管獲恩梳（Duncan Walkinshaw）話：「請里奧嚟講波呢單嘢，我哋已經傾咗兩年，關鍵在於曼聯肯唔肯，同埋里奧點樣保持狀態；但我哋國家嘅訓練設施係世界一流，好似曼聯喺1月都嚟過集訓。對於阿拉伯嘅電視台嚟講，請球壇名人講波係好普遍嘅事，就算要搵多個人繙譯都冇所謂。」
雖然外國傳媒冇提過，但我求大俠陰謀論啲去睇件事，里奧有可能因為去卡塔爾講波，而專登退出國家隊。曼聯向來重視商業宣傳，派里奧去多哈講波，肯定有錢落袋，同埋會令更多中東人認識曼聯，所以紅魔絕對有動機咁做。曼聯喺1月全隊去過嗰度集訓，話唔定嗰陣已經傾掂數，約好呢次國際賽期去講波。點解里奧可以咁早應承，唔怕到時要為國服役？因為自鶴臣上任，從來都冇召過里奧，加埋英格蘭有唔少中堅可以用，曼聯同里奧應該冇諗過鶴臣會突然召番佢。
里奧周四就喺twitter試圖淡化呢件事：「喺預計之內嘅假期飛去其他地方，睇吓波又講吓波，其實我上次國際賽期都係做緊呢啲嘢。」