泛民主派大團結，真普選聯盟正式誕生﹗但噚日記者會上，八方見到一班聯盟成員個個面左左，塊大橫額仲突然甩咗，認真唔吉利。
發言時火藥味重
中國人講意頭，聯盟「開張」自然要夠氣勢。記招出席者眾，就連塊banner都落足本，size零舍大過人。
當記者會輪到民主黨副主席蔡耀昌（狗哥）發言時，佢譴責北京放風話2017年特首選舉要篩選，話口未完，後面條banner就跌咗落嚟，大家夾手夾腳都貼唔番上去，最後要成條拆走，改貼個logo頂住先。
出師未捷banner先跌，認真唔吉利。其實呢個大聯盟成立之前已有唔少是非，好似人民力量未加入已經「紮晒馬」開列三大條件，是但做唔到一樣都拉隊走。
民主黨亦還拖話唔應該有前設，加上新民主同盟做「架梁」發聲明批評真普聯變成「民主黨的私人俱樂部」。記招上，雖然一眾泛民手蹺手，笑笑口高呼爭取真普選，不過發言時仲好有火藥味。
好似狗哥話民主黨好開放同任何政黨討論，但如果有人講嘅唔係事實、惡意攻擊，民主黨會強烈反駁。人力主席劉嘉鴻即時撇清關係話今次唔係講人力，仲笑笑口指住新同盟嘅范國威。八方現場所見，范國威同民主黨主席劉慧卿都面黑黑。卿姐之後話有事做，索性率先拎袋走人。大敵當前，學民協馮檢基話齋，泛民冇分裂嘅條件，有乜嘢牙齒印都抹咗佢，好好利用呢個平台爭普選啦。
mailto:[email protected]