【各有性格】
平民教宗方濟在短短一星期間贏得各地民眾和傳媒歡心，連經常狠批教廷的意大利傳媒也作正面評價，在梵蒂岡工作剛好兩年的韓大輝認為新舊兩位「老闆」風格不同，本篤十六世斯文、有學者風範，出口成文，道理簡潔。方濟喜歡「爆肚」，講道時會講笑，十分鬼馬，「而且佢歌喉其實唔錯，我覺得好聽過本篤」。
韓大輝︰「從服飾就可知道，佢選完出嚟嗰陣只係着住最基本嘅白長袍，叫自己做羅馬主教，而唔係教宗，拉近自己同弟兄嘅距離，令佢好快贏得傳媒歡心。」
他解釋，教廷本身有穩定的制度，本篤十六世擔任教宗前，已在教廷工作逾20年，自然地進入格局，「佢（方濟）新入嚟，好多形式上嘅嘢都改變咗，好似佢嗰日開完彌撒，行咗出去同啲人握手，雖然只係幾步，但其實嗰度係意大利國土嚟㗎喎，一個國家嘅元首突然間去左另一個國家，個保安問題應該點處理呢？出咗事邊個負責呢？佢身邊嘅人都要適應」。
當晚選舉後，方濟未有乘教宗專車，而是和樞機們搭巴士，「連同巴士嘅人都唔知佢喺度，仲喺度講緊佢，其實佢有選擇㗎喎，佢就係選擇咗呢種簡樸方式」。
講道不戴冠 樞機即除帽
就職儀式當日，韓大輝與其他官員排在一眾樞機後排，觀察到不少新人事新作風。他指，儀式程序做足，但以誦念代替歌唱，令儀式縮短，講道又不戴冠（高帽子），「佢講道理嘅時候唔戴喎，俾樞機見到，咪即刻一個二個除番落嚟囉，所以𠵱家佢身邊負責禮儀嘅人好緊張㗎，成日都會留意佢嘅習慣同喜好」。他解釋，教宗是教會所有權力的核心，「所有規矩都係佢話改就可以改」。
韓大輝又指，教廷規定，當日參與彌撒的信眾都可以得到「大赦」，意思是信眾參加這次彌撒後，只要妥善辦告解，就可以免除懲罰。
《蘋果》記者