《喜》
唔經唔覺，朗尼已經代表咗英格蘭10年；由初出道成部小型坦克車咁，到𠵱家成為前場組織核心。近年，朗尼頭髮少咗，喺國家隊入波亦冇以前咁多，但就一年比一年重要。
03年2月13號，英格蘭主場友賽澳洲，朗尼首次幫國家隊上陣，下半場後備入替奧雲。4月2號對土耳其嘅歐國外，當時領隊艾歷臣已經重用朗尼，首次搵佢打正選同奧雲拍檔；雖然17歲嘅佢冇入波，但球隊都贏2:0。朗尼之後經歷多次大賽，榮譽雖然冇，但回憶就好多；包括06年世盃8強鬥葡萄牙，佢侵犯卡維奴被罰紅牌離場，間接令英軍出局，相信係佢人生中最難忘嘅紅牌。
朗尼至今為英格蘭79次上陣入33球，但近年佢越踢越後，似中場多過前鋒；領隊鶴臣表示，朗尼已由射手蛻變成10號仔，係進攻靈魂，入波唔係最重要。