解放軍殺入中環？
近日中環友發現，有人身穿解放軍制服在中環出沒，於是向《爽報》報料，難道佔領中環雖未成事，已經要出動解放軍鎮壓？
特工隊明查暗訪，發現軍人是假的，軍服卻是真的，在距離解放軍總部只是幾街之隔的一條小巷，有人擺檔售賣解放軍、公安及武警制服，件件真品，連駐港解放軍也到場視察；法輪功認定檔主是中共兵哥，在檔前懸起橫額降魔伏妖。圖、文：中環特工隊
中環余道生行旁邊的德忌利士巷，除了是煙民打邊爐勝地，亦是胡子文的軍事王國，別看鐵皮檔只有丁方尺寸，其實禾桿冚珍珠，最新款的解放軍、公安及武警制服、徽章，就大喇喇掛在巷口檔前，中環偌大，此處最紅。
自從1984年電影《赤色黎明》令解放軍制服流入荷里活，中國嚴禁買賣軍服，究竟胡老闆如何入貨？原來他有不少朋友行船，途經美國時總會替他購入當地軍品，他就捧著美國貨到偉大祖國，跟相熟軍官以物易物，「我拎啲美國佬嘢同佢哋交換囉，唔賣得咪交換，軍隊唔賣得嘢㗎，犯法㗎嘛！」
國家富起來，他的生意也做起來，「以前中國窮，件制服著到爛先至換；両家有錢，一年換兩套，冬天一套，夏天一套。」他專揀皇崗口岸進出，海關人手較少，否則搜出定必充公。
消息驚動了駐港解放軍，專誠跑到檔子看個究竟，原來軍人有樣睇，「佢哋個頭好得意㗎，起角㗎，永遠都係嗰個look，但唔會同你講嘢，影張相返去交差囉。」
檔子同時售賣英、美軍徽章，部分是跟訪港美軍交換得來，「佢哋拎嚟換大陸嘅章同帽，去蘭桂坊扮鬼扮馬，外國人好鍾意大陸軍品㗎。」他鄉月光特別圓，大陸軍官則愛外國貨，「佢哋通常鍾意美國嗰啲，前排就鍾意香港剩落嘅英國嘢，買返去送畀人囉。」就連胡老闆也不好國貨，「比較老套囉，好多都係抄美國，咪等如著咗件老翻囉！」
六四鎮壓部隊的軍章，中外人士的態度亦南轅北轍，外國人當寶，內地人卻棄如敝屣，「得鬼佬要，鬼佬覺得係一個事實，一個歷史；中國人呢，鎮壓吖嘛，（收藏）驚畀人打呀！」
胡子文年屆半百，年輕時已是軍事狂熱者，初生之犢不畏虎，18歲便跟志同道合者北上惠州玩真槍，因此結識大陸軍方，「AK47嚟㗎，葉繼歡用嗰隻！」
1994年考獲槍牌，槍會中不少神槍手皆為紀律部隊人員，其中1996年射癱葉繼歡的警員便是他老友，難怪槍法如神。坊間傳言，當時一眾警員於西環碼頭一帶巡邏期間，發現葉繼歡與同黨挾重型裝備上岸，警員自知不夠打，遂與葉協議放生，各走各路，誰知警員乘葉轉身逃走時從後開槍，令一代賊王下半身癱瘓，下半生坐牢。
胡證實了這個傳聞，但也為好友平反：「佢（葉繼歡）拎住咁多架生，你做警察都係一份工，唔會同佢搏㗎，大家當無事行開囉，但佢（開槍警員）喺架車度唔知咩事，咪開槍囉！」
胡老闆笑言多年來買軍事用品的花費夠買幾層樓，難怪無女人頂得順，「我十個朋友，九個都無結婚，如果有老婆，一早掟晒啲嘢出街。」事實上他曾於廿幾歲結婚，但老婆受他不了，一年後離婚。
原是水電工的胡子文，最後索性把興趣放到事業上，五年前起先後在深水埗、旺角開鋪賣軍事用品，惟「解放軍」也敵不過地產霸權，狂飆的租金把他擊得節節敗退，而在中環賣燈膽60年的老父三個月前病逝，胡子文最後只好瑟縮於亡父留下的鐵皮檔。
大律師黃軒利表示，倘若一般市民穿著香港警員制服即屬違法，但本港並無就中國軍服立法。
街訪
中環報料WhatsApp:94993777