【本報訊】資深大律師胡漢清母親莊永楚，昨下午突然召開記招，終「逼宮」成功，令兒子急託立法會議員張宇人「求和」。母子錢銀轇轕未解決，莊永楚契女白韻琹爆出，莊雖早立遺囑把家財留給兒子，但「佢又話最近寫咗另外一份，不過未簽」。未知是否作談判的籌碼。
記者：翁煜雄
白韻琹昨日下午突代表莊永楚通知傳媒，下午4時半於立法會議員謝偉俊在立法會大樓的議員辦事處開記招，稱莊「想親自會見各傳媒朋友，接受任何詢問」。謝偉俊沒有解釋為何借出辦事處開記招。大批傳媒準時到場，卻未見莊永楚，只見白韻琹主持大局，「Linda（胡母洋名）情緒激動休息緊」。據知當時代表胡的立法會議員張宇人，正與胡母及謝偉俊密斟。
想取回房屋及千萬
白韻琹表現也相當「激動」，長達10分鐘獨白幾次喊出聲音，幸眼淚不太多沒弄污妝容：「我係唔想參與家庭倫理劇，因為尤其係悲劇。冇辦法，我見到個老人家不斷入醫院。」她稱胡母為契媽，認識數十年，本如「貴婦」般的胡母有氣管炎、腳痛等百病纏身，只想從兒子取回房屋及逾千萬元現金，「我冇辦法唔出嚟陪佢做呢一樣嘢（開記招），因為我冇辦法搵到佢（胡漢清）」。
白坦言開記招是「逼宮」，「希望各位記者可以幫手解決呢個倫理嘅問題。可大可小㗎，可以係小嘅，我其實今日希望Alan（胡漢清）可以嚟到」。她似不滿胡以需在法庭處理仲裁為由，只派張宇人傳話，「佢話幫人調停緊，咁我話你幫人調停緊，你不如幫自己調停啦」。
胡母後來終現身見記者，白韻琹一直在旁提點，每當記者提及敏感問題，如「你個仔係咪不孝？會唔會唔認個仔？」等，白多番打斷：「唔好意思，我有心唔想你哋問。𠵱家（母子）有偈傾吖嘛，都希望佢同個仔保持良好關係」。
白稱胡母另立遺囑
不過，白韻琹始終禁不住為契媽盡訴心中情，「佢犧牲自己結婚嘅機會，湊大佢個仔，畀佢去最好嘅學校，做最好嘅職業」。她說可惜胡漢清令母心碎，早前胡漢清透過好友、前特首曾蔭權弟弟曾蔭煊，向母親送年糕，但胡母憤而當面把年糕丟到垃圾桶，「佢話我要嘅唔係年糕，我要嘅係我個仔，同埋佢對我嘅承諾」。她又透露胡母4月需拍賣珍貴首飾套現。
白又透露因早前與謝偉俊為胡母運送物件時，只見當中有不少Chanel、Ferragamo、LV等名牌，「佢話全部畀我，有好多根本係未拆㗎」。
白韻琹又主動說，胡母將一份30年前寫的遺囑給她保管，「佢所有財產都係畀獨一無二嘅親生仔」。稱84歲的莊永楚坦言，「Alan只要等多幾年就可以攞晒我啲嘢，我冇理由有100歲㗎」。不過，白韻琹最後「補一槍」，「佢（胡母）又話最近寫咗另外一份，不過佢未簽名」。