人在梵蒂岡，唔怕冇古講，事關入面一幅畫、一嚿石，甚至地下踩住嗰嚿磚都大有來頭，件件都可以追溯到八方伯爺個伯爺嘅年代，雖則係咁，唔等於教廷中人就唔與時並進。八方同事過去呢個星期，日日蒲聖伯多祿廣場。採訪教宗就職儀式當日，攝記可以搭lift上廣場頂樓，唔使好似以前咁拎住幾箱架生，粗身大細行樓梯行餐死，上到去仲有免費Wi-Fi任用，send相send片完全冇難度。
更強勁既係，韓大輝總主教噚日接受完八方訪問之後，喺個袋度拎咗樣嘢出來check schedule，呢樣野竟然係iPhone 5！韓總仲輕描淡寫話，教廷已經幫所有官員轉晒用iPhone 5，黑莓淘汰晒架嘞，唔知Steve Jobs係天堂聽到呢個消息，會唔會覺得又勝一仗呢？
David話，蒙氏咖喱牛腩飯同集團一齊成長，話說34年前老爸去神戶傾生意，當地一個印度朋友教佢整，再加以改良。「我幫佢切洋葱切到標眼淚。」既然承信興家，佢話𠵱家着手構思，唔用咖喱撈牛腩，改用拼生果，「𠵱家唔少人食齋嘛。」八方探吓秘方，佢賣關子話：「一定唔可以用西瓜。」