黃秋生一向都口不擇言，之前因為話唔識台灣舞王羅志祥（小豬），搞到同小豬fans喺網上罵戰，沒完沒了，點知呢個火頭啱啱熄，秋生又辣着另一個，事緣係因為佢之前踩彭浩翔執導、杜汶澤主演嘅《低俗喜劇》低俗，噚日再有報道話秋生同傳媒傾偈時，繼續踩《低》片，佢除咗質疑阿澤之前喺電影評論學會頒獎禮得影帝外，更聲稱話自己當日入戲院睇《低》時，睇到一半因為太過意淫頂唔順要離場，又話拍戲好易，只要搵啲女仔喺鏡頭前面跳下繩賣弄性感就得喎。
「感謝提點祝新戲大賣」
阿澤畀秋生踩到埋身，噚日佢喺Instagram留言：「我一直認為黃秋生先生是兩岸三地最傑出的演員之一，倘若前輩不認同本人之演技，晚輩定當努力向上，虛心學習，希望能為觀眾提供更佳的娛樂。感謝提點，並祝新戲大賣。」雖然阿澤留言禮貌周周，不過似乎好似指秋生借佢嚟宣傳為即將上映嘅新戲《葉問─終極一戰》，寸得嚟又有禮貌，呢鋪阿澤勝出。
撰文：馮仁昭
想睇更多首輪猛片介紹同預告片？《一台戲》為你網羅最新電影介紹及影評↓↓↓↓
http://hk.movies.nextmedia.com/