市民對財爺鬍鬚曾份預算案彈多過讚，泛民提出修訂，希望減表現不濟嘅司局長一年人工，12位局長之中，教育局局長吳克儉同勞工及福利局局長張建宗一枝獨秀，兩人至少被兩個黨要求減薪。
「學咗好多嘢」
隨時冇糧出嘅吳克儉話「真係唔擔心」，仲話自己呢大半年嚟學咗好多嘢。吓！乜𠵱家納稅人每個月出30萬糧畀你嚟學嘢㗎？公民黨同工黨都嫌吳得掂太廢，要求減佢一年人工。
吳得掂就話「尊重每一個人合情、合理、合法，對我哋嘅期望同埋要求」，又話「香港有既定嘅制度去處理有關呢一部份嘅工作，所以呢，我真係唔擔心」。
八方都知道喺分組表決機制下，泛民修訂好難通過，但吳得掂都唔使咁大安旨意啩。佢仲話做咗大半年局長真係學咗好多嘢，覺得好激勵，相信同各方做好溝通就得。
八方問過合眾人事顧問總經理蘇偉忠嘅意見，蘇先生話局長呢個位確實係值357萬蚊，問題只係個人值唔值。
因此可以探討一下局長行底薪加浮薪制，浮薪嗰一部份就視乎局長平時嘅表現，但係，咁又帶嚟點樣評定官員表現嘅問題。