新秀麗（1910）舊年份成績表夠晒省鏡，多賺逾七成至近1.5億元（美元．下同），獲各大行一致讚好，繼續叫大家放心入貨。高盛就話，留意到新秀麗第四季收入增長已經加快，由第三季增逾7%，急速擴大至18%以上，當中亞洲市場大增17%；歐洲亦扭虧，由下跌8%轉為增長1%；美國自然增長更高近27%，遠高於第三季增幅。
點解新秀麗可以喺美國、德國、日本、中國等市場都有咁好成績？大摩話好簡單，成功之道在於捨得畀錢做研發同推廣。新秀麗不但在全球市場具領導地位，今年更積極攻入新興市場，如俄羅斯、巴西、墨西哥等，藉以彌補成熟市場放緩的影響。
資本開支大增一倍
高盛預計，今年新興市場收入增長至少一成，在歐洲市場需求穩定等因素支持下，相信今年業績一樣可以繼續咁強勁，所以將目標價調升至23元。
新秀麗唔單止識經營之道，今年仲大手投放7,300萬元資本開支，比舊年足足多一倍，部份用作建歐洲新倉庫，提升營運效率。舊年又收購High Sierra同Hartmann兩大品牌，擴大美國、北美洲休閒手袋同高檔行李箱市場份額。星展指新秀麗現有淨現金超過1億元，如果再物色到收購項目，特別是商務及休閒品牌，增長前景將更勁，故維持買入評級。
瑪姬兒