美資大行摩根士丹利前日出報告，估恒指2015年前見五萬點，較現水平升1.24倍，股評人普遍嗤之以鼻，認為大摩想引人注意居多，但呢單嘢令人諗起幾十年前第一代股評人潘鑑韜，佢喺恒指約千點時，估恒指會升到三千點，又真係講中，堪稱股壇一代傳奇人物。
潘鑑韜估中三千點
年輕股民未必知道潘鑑韜係乜水，有20、30年投資經驗嘅股民一定識佢。佢有個朵叫做「潘三千」，沿於83、84年中英談判期間，恒指約千點，佢就估陰霾過後，恒指會升上三千點，因而被人叫做「潘三千」，恒指確實喺87年升穿三千點。
87年股災前佢估恒指會升上一萬點，被人改叫「潘一萬」，回歸前佢估恒指97年後見兩萬點，又變成「潘二萬」。之後恒指高見一萬點（93年）、兩萬點（06年）、三萬點（07年）都穿過，潘鑑韜都可以話係睇得準，只係遲好幾年先發生之嘛。
沈大師：譁眾取寵
潘鑑韜當年對恒指嘅大膽預測，同大摩估恒指見五萬點，令市場哇哇聲嘅程度不惶多讓。
股評人沈振盈認為，大摩想譁眾取寵居多，報告提出四大原因令恒指升上五萬點，其中一點用圖表分析，指恒指每隔6至8年見高位，沈大師直斥呢種係死讀書嘅計法，加上冇人知道中國經濟增長有冇變數，唔可以就咁估恒指2015年前升至五萬點。
資深股評人陳永陸亦指大摩想吸引眼球，「見五萬點就大家拍手」。
股民當然想呢支摩笛吹得響啦。
李華華
mailto:[email protected]