梁振英召開經濟發展委員會，特別介紹三位「重量級委員」，就係中國國務院金融研究所副所長巴曙松，新加坡前外交部長楊榮文，台灣前財政部長劉憶如。
嚇人咩，有乜咁重量級？講國際學術地位，在香港嘅經濟學者劉遵義、王于漸、廖柏偉、雷鼎鳴一定高過佢地。講實際行政、政治經驗，巴曙松只係幕僚，並非大官，楊榮文與劉憶如做過部長，係威啲，但新加坡與台灣嘅經濟體制與香港完全唔同，如果佢兩位只係將新加坡、台灣經驗應用於香港，撞板多過食飯。新加坡政府慣咗說了算，民間無反對聲音，例如以新加坡填海規模之大，點解冇環保分子上街㗎？香港啲綠色ABC在新加坡全無對口單位噃？至於台灣，由蔣介石三七五減租開始，工商業就習慣咗放棄政治發言權以爭取經濟派糖（國民黨兩蔣時期之主要管治策略），慣晒接受政府之企業福利（corporate welfare），與香港商人之自主奮鬥心態完全唔同。劉憶如部長嘅台灣政務經驗與香港有好大文化差異，佢係芝加哥大學經濟學博士，不如請教吓佢嘅芝大經濟系師兄王于漸、雷鼎鳴、袁天凡等等，學習香港環境。劉憶如媽媽郭婉容教授（前台灣財政部長）嘅台大經濟系老師張果為教授，晚年時曾在中大做訪問教授，左丁山係佢學生，去台灣探佢，佢就慨嘆：「我啲台灣學生寫碩士論文，寫到結語篇談Policy Implications，總離不開要求政府做一做二，無政府干預不行，與你地班香港學生當政府不存在嘅思維，完全不一樣。」港台經濟思想，截然不同，此乃好多年前之事，但果為師之言，相信仍然冇過時。
可能因為香港經濟學術界無人贊同政府直接干預工商業，直接投資關鍵產業，所以梁振英先生要搵巴曙松、楊榮文、劉憶如三人來港扮稻草人。甚麼是關鍵產業，有高度爭議性，政府消息指資助形式包括直接投資、稅務優惠，人力培訓及土地。一講到土地，香港人人會睜大隻眼㗎，撥地俾甚麼「關鍵產業」，一定有排嘈，納稅人交稅，派社會福利，雖不宜派得太多，猶可以安居之扶貧，俾一個好藉口，但用公帑向工商業派優惠，明益有錢人？左丁山第一個反對啦！