三月中最啱去京都賞櫻，對於長跑達人──恒生銀行（011）大公關張樹槐（水哥）嚟講，去京都跑馬拉松仲爽過賞櫻。本月10號，水哥第一次參加日本舉行嘅馬拉松，雖然無暇造訪藝伎之鄉祇園，但喺終點就同扮藝伎嘅模特兒合照，證明到此一跑。
連和尚都幫拖打氣
佢話今次深刻體會大和民族嘅團結同縝密心思，比賽跑手有15,000人，但圍觀市民竟達43萬人，約佔京都三成人口，沿途有太鼓助慶，氣氛高漲，經過廟宇時，連和尚都出來打氣。
日本人以禮讓見稱，跑步當然甚少鬆踭，偶爾攝位碰到，都即刻係咁講唔好意思，跑畢全程，志願者仲喺每名跑手肩上逐一披上毛巾，窩心至極。