新立法會大樓近期喺午飯時間，都有一大班「蝗蟲」進佔；唔係拖篋掃名牌嗰啲，而係政府總部嘅公僕。話說一到食飯時間，逾百公僕就會大舉入侵立法會飯堂搶食，立法會唔排除推「立會飯，立會人」。
一個餐慳3蚊
政總蝗蟲有幾大陣容？八方見噚日中午12點鐘一放飯，立法會側門就有條人龍等攞證，普通人唔可以憑「食飯」之名入立法會；若以「使用圖書館」名義就得嘞。據立法會職員講，平均每日食飯時間發出近200個證，極大部份係政總公僕。八方睇住呢班攞咗張證嘅人，最終直入飯堂醫肚。
公僕鍾情去立法會開飯，據聞同抵食有關。據知唔少公僕都覺得，喺金鐘食肆食個晏，閒閒哋4、50蚊先落到樓，立法會最平做到30蚊有埋嘢飲，而政總嘅飯堂，一個餐平均貴立法會3蚊，唔怪得同一時間政總餐廳仲有吉位，立法會餐廳就有人滿之患。
立法會秘書長陳維安原來都諗緊計，保障立法會本土權益。既然「港人港地」理念有市場，佢都考慮推出「立會飯，立會人」，繁忙日子請餐廳預多幾個午飯，專畀立法會上下中人享用，遲吓仲會買多幾張大枱，等立法會職員唔使等太耐就有位醫肚。
mailto:[email protected]