有美資銀行公佈最新一份的本港百萬富翁報告，一如既往這調查都是經由港大負責進行，而今年的百萬富翁人數又創新高。2012年香港擁有至少100萬流動資產的「百萬富翁」超過60萬名，佔總成年人口11%，即係每9個人就有1個係百萬富翁。不過今時今日有100萬都不過係僅僅夠畀首期買間「窮人恩物」，稱謂「富翁」實在高攀，再以「中產財爺」每年連預繳，交嘅稅都唔只百萬相比，就更叫人汗顏。真係要以「富」為名，頂多只係「富毫」，富中微毫。
香港成也房屋 敗也房屋
點都好，60萬人不是少數，且比去年同一調查增長14%，若外人不知情況，單看數字必定以為香港是亞洲「油城」，坐以待富。實情是，雖然土地冇「油」，但係可以起「樓」，一樣生財。所以上述「富毫」身家上漲，其中三成二是因為過去一年在物業買賣有所獲益，不過報告亦指出有22%受訪者現時並沒持有任何私人房產。到底是高位出貨？還是另有投資？就不得而知。不過無論有樓冇樓，這些「富毫」的生活滿意度平均有7.1分（以10為滿分），應該蠻不錯。所以話乜「有錢唔代表快樂」未必啱晒，但喺香港「冇錢就好很大鑊」就必定冇錯！
仲唔信？咁不如又睇吓另一份咁啱同日公佈嘅報告，樹仁大學經濟及民生研究計劃較早前做咗項港人生活困苦度調查，結果顯示，喺1,500名嘅受訪者當中，超過七成人認為港人（即係自己）生活痛苦，而其中更有16%人感覺非常痛苦。再將調查所得資料進一步分析，港人的困苦源於六大民生範疇，包括房屋、就業、物價、貧困、環境污染和人口老化。「房屋」困擾不出意料自是頭號罪魁，而七成人視高樓價為禍首也是順理成章，只因樓價帶動租金飛漲，再而推高物價已成常態，試問基層又如何脫困解苦？
這邊廂富者越富，那邊貧者越貧，貧富兩端只有越扯越遠。去年堅尼系數亦破紀錄，創下0.537新高，官員忙着為算式辯白，說甚麼撇除稅項、福利轉移種種，相關系數與五年前相若喎。轉頭已有社福團體發表數據，香港嘅貧窮人口達16%，呢次係6個就有1個係窮人。自欺欺人莫過於此。
樓價租金物價持續居高不下，今年堅尼系數縱然再接再厲，警號大作，亦不過勞煩膠官出場忽悠一番，說不定到時有個厚顏還會說：「我很明白基層生活，因為我都（曾經）係草根，又鍾意飲奶茶，睇周星馳。」「官喎！」
盧先亞