百貨股銀泰（1833）日前出咗全年業績，如單睇P/L（收入損益表）認真唔錯，第四季有復蘇，仲向分析員表示今年同店銷售唔會差過舊年，可炒一陣。但有芬佬從來唔諗呢隻股票，因睇佢個資產負債表，一大堆「關連人士貸款」或「應收關連人士款項」，合共近18億（人民幣．下同），咁多唔透明的數，無論點吸引佢都話費事搞。
銀泰呢個詬病已幾耐，百貨股最勁就喺現金流，銀泰就充份利用這優勢，科水畀合營公司一齊搞地產project，起好樓後，銀泰就可以接收百貨嗰part，然後沽返寫字樓、住宅部份的權益畀合營夥伴。呢種做法好處係拍住地產商起樓，利潤當然豐厚啲；但壞處就係要承受市況逆轉、房地產下行風險。
銀泰日前改名，由「百貨」改叫「商業」，擺明向搞商場、網購等發展。銀泰去年經營現金流入減少，負債上升，將19億資產押咗畀銀行以取得35億元融資額度。公司今年10月有19億元可換股債券要贖回，料銀泰盈利前景會比其他百貨股好，但小心盤數拉得較盡，背後承擔不少風險。
海迪