求驗客手記:限曼城周六畀新約<br>貪心耶耶 跳草裙舞

求驗客手記:限曼城周六畀新約
貪心耶耶 跳草裙舞

非洲草原百獸雲集,曼城中場耶耶托尼嚟自「大象國」科特迪瓦,但竟學識鄰國喀麥隆嘅「獅子開大口」;本身已拎緊曼城最高人工嘅耶耶,不滿球隊對佢嘅續約遲遲冇回覆,據報經理人已經向球隊發出最後通牒,周六收唔到新約就同其他球會傾轉會。

收緊28萬鎊周薪

29歲嘅耶耶2010年由巴塞加盟曼城,已花咗球會2,400萬鎊(約2.8億港元),仲拎埋全英超最高嘅28萬鎊周薪。講真耶耶一路都好夠球品,絕冇揸流攤,上季幫曼城拎英超冠軍,今季亦都累積5個英超入球,係曼城除咗前線外,入波最多球員。

成隊麻煩友 文帥心淡

眨吓眼耶耶嘅合約,喺2015年夏天到期。佢一心以為自己嘅表現,一定可以續約,點知越等越唔對路;佢嘅經理人施路克周二就發炮:「耶耶喺未來3至4天續到約就冇問題,如果過咗限期,我哋會同其他球隊傾談;今日係星期二,所以星期六就係限期。」就算續唔成約,曼城仲有一年半約,但根據國際足協規定,球員可以自行買斷最後一年合約,然後自由身走人。屈指一算,耶耶都係畀約1,500萬鎊就可以自由身離隊,以佢嘅級數,大把球會願意幫佢出。不過施路克都講到明,耶耶離開未必係人工問題,施路克就爆耶耶想走,因為喺球會,除咗文仙尼,得唔到其他人尊重;不過人為財死,我求大俠就唔係好信耶耶唔想退休前博張大合約嘞!
曼城領隊文仙尼認真煩,愛將耶耶嗌走,踢走麻煩友巴洛迪利後,球會紀律又冇咩改善,前鋒泰維斯因停牌期間照揸車,隨時要坐監;法國翼鋒拿斯尼就成為蒲精,今季就好似球場隱形人。文仙尼上仗輸畀愛華頓後已經心淡,與球員關係破裂,亦都打定輸算今季尾就離開。