政府連番出招，銀行又加按息，搞到樓市交投死寂，地產代理首當其衝，龍頭行之一美聯物業（1200）噚日傳出裁員，高層就話只係換人。
要食糊 先換低質員工
業內瘋傳一個有關裁員嘅手機短訊，劈頭就係「萬招皆下品，惟有捽得緊」，指家陣形勢危急，若有以下「無生意、沒有生命力、生產力、質素低的」是但一樣特徵嘅前綫，「都先請他們上路」，仲話𠵱家係雷厲風行嘅時間。
睇見咁嘅短訊，真係心頭一凜。美聯董事總經理黃子華承認，係佢發出呢段短訊，但部份內容遭人惡搞，包括「美聯cut人」係俾人加上去。佢強調，唔係裁員，只係換人，將質素冇咁好嘅換走，提升競爭力，「好似打麻雀咁，將唔靚嘅牌換走佢，先食到糊」。