今次共產黨選出新領導人，梁振英上京兩次，基本上係被冷待。第一次胡溫謝幕，佢列席人大會議，在限奶令問題上俾中聯辦主任張曉明公開訓斥唔識換位思考；第二次選出新領導，習近平接見，又再「抦」多一鑊，一句關鍵在「抓緊落實」，暗斥佢冇做好團結港人工作。
梁振英都好醒，前日在京冇中央重要部委見，諸如商務部、發改委，就立即走去天津扮忙，美其名搞內交，實際是吹吹水，轉移話題。昨日返京見外交部、人行及證監，但又冇財金官員隨行，唔知佢傾乜？
為轉移焦點，梁振英日前參觀天津規劃展覽館話，香港近年欠可供開發土地，造成樓價和租金高企，而內地城鎮人均居住面積則較香港高，故特區政府要提升平均居住面積，讓新一代住得寬敞云云。他臨走前為規劃館題辭「溫故知新，與有榮焉」八字，為自己面上貼金。
振英林鄭無力解決劏房
香港人見到真係眼火爆，呢邊廂花園街大火死因聆訊，見到基層巿民住劏房苦況，林鄭一味做show貓哭老鼠，由幾年前土瓜灣塌樓到花園街大火，除流下幾滴cheap眼淚之外，做過乜嘢去解決劏房問題，𠵱家越嚟越嚴重，梁林二人束手無策。
一個在天津大言炎炎，話要效法內地提高人均居住面積，讓新一代住得寬敞。XYZ，𠵱家劏房都冇一丁點迹象解決，仲劏到去工廈，越劏越多，而資助房屋起唔夠，排長龍，你解決唔到之餘，竟然仲去吹水話畀香港人住大啲，當人白癡咩。另一個林鄭就一如以往扮感性，為花園街大火死難者難過，由2007年出任發展局局長年代至今，權傾朝野，曾蔭權對佢言聽計從，佢主政土地政策、重建、新發展區，難道對基層市民住屋困境，毫無政治責任要負？今日仲有面反過來扮旁觀者表達同情？
正如習近平所言，穩中求變，知易行難，口號人人識嗌，抓緊落實不容易。住大、住好邊個唔想，但嗌口號之前，先要諗清楚點樣可以deliver，調動各方力量去攻堅解決難題。梁振英管治作風似老董，講咗當做咗，以為一切會自動發生，事前冇討論清楚執行細節，民粹決策，討好民意，到做唔到就諉過傳媒、政黨、唐營工商界。不但劏房解決唔到，就連一條限奶粉出境法例，都搞到唔清唔楚，執行細節漏洞多多，可以預見下一鋪「港人港地」，又將如限奶令一樣，執行上錯漏百出。
政客作風唔緊要，但做政客也要懂得辦事，而非一味吹水！
添馬男