你有本事令全身癱瘓的病人翩翩起舞嗎？王廷琳做得到。
在香港舞林，王廷琳三個字響噹噹，他不止是專業舞蹈一代宗師，更以愛心爆棚著稱，17年來教智障兒童跳舞，其餘學生還有愛滋病、唐氏綜合症、自閉症、末期癌症、精神病、失明、痙攣病人。這些年來貢獻良多，早前獲頒行政長官社區服務獎狀。
王老師仁心解碼，指特殊學生比一般人更純粹，這是學舞的不二法門，「教（正常）成人跳舞係好大挑戰，好多人年長先學跳舞，對自己有標籤，點解要跳舞？係咪太遲跳舞？人哋會點睇我？反而特殊人士好好教。」記者：陳勝藍 攝影：潘冠恩
行年47的王廷琳強調，肢體殘障也可起舞，「我有個學生只得眼睛同兩隻手指識郁，佢點跳舞？佢用手指公按動電動輪椅，飛快走向前走，可以轉圈，我上輪椅攬住佢，其他人圍住輪椅跳舞。」這也叫舞蹈？「一個坐輪椅、從來冇落過地嘅小朋友，佢落輪椅喺地上爬、滾，睇落冇乜嘢，但佢去咗個新嘅空間。」
向特殊人士傳授舞技也有酬勞，但萬萬比不上專業排舞大茶飯，偏偏王老師講心不講金，「如果人唔做一啲令自己快樂、令人覺得有少少意義嘅事，就係浪費人生。」大徹大悟於何時？「30歲，爸爸在車禍意外中喪生，令我唔再攀登事業高峰。」
他生於河北，11歲來港，媽媽是聲樂家兼鋼琴家，乃劉詩昆的同班同學，爸爸寄望兒子承繼媽媽衣砵，可是王廷琳連六級鋼琴也考不上；1988參加新秀歌唱大賽，準決賽止步，對手鄭伊健及劉錫明一個當了歌星，一個變成毒瘤，王廷琳則立志當舞蹈家，本獲無綫舞蹈藝員訓練班取錄，卻因家人激烈反對而作罷，但他最終還是考入演藝學院修習芭蕾舞。
男人老狗扭身扭勢，爸爸一直不諒解，直至兒子學成演出，爸爸到場欣賞，「他第一次，也是唯一一次睇我演出，當晚佢睇得好開心，覺得個仔終於有啲成就，做到啲野。」正當父子關係柳暗花明現轉機，一次王廷琳在香港芭蕾舞團排舞，忽聞爸爸撞車，腦幹死亡。
「我從來冇講過爸爸對唔住、唔該晒、多謝你、更加冇講過我愛你三個字」。終於一晚半夜三更跪在病床前，握着爸爸的手，說：「爸爸，我愛你！」他向記者解釋：「除咗為佢做，亦都係為咗我做。我做咗一世人，有啲嘢從來冇表達過。我而家咁外向，鍾意表達自己，係由當時開始。」
煎熬一周，家人決定替爸爸拔喉，捐出所有器官。王廷琳打擊很大，一度剃光頭勘探生死；那時候開始茹素，至今不沾腥葷；到紐約練瑜伽時，冰天雪地下淋凍水求解脫。
其後某個聖誕夜，他在一班殘障小孩跟前獻技，有個坐在輪椅上的男孩露出一臉欣羨：「如果我可以跳舞，係幾咁好！」當下王老師口輕輕拍心口：「Ok我教你！」男孩不久便離開人世，這張空頭支票永沒兌現。身邊兩個人死亡，令他學會珍惜生命，「令我覺得，如果生命咁短暫，點解要浪費？」
打從爸爸出事那天他離開芭蕾舞團，便沒回去，反而改跳現代舞，成為出色舞蹈員及排舞老師，1996年演藝學院與聖雅各福群會合辦特殊兒童服康服務，找他教舞，「班上有20個同學，我完全唔知佢哋嘅語言，或者點樣教佢哋跳舞，當日我上完堂就喊，我覺得自己做唔到一個好老師。」
兒童院裏的男童、女童最難教，「佢哋好多心結，試過成堂指住我鬧，但幾個月後終於對住我喊。」他甚至曾被智障學生扯脫眼鏡弄毀，但後來發現只要摸清對方習性，他們比一般人更易教，「同一個動作做十年八載都唔覺得悶！」不過，有時特殊兒童也很前衛，考起舞蹈大師，「我唔係好鍾意跳騎馬舞，但佢地好中意！」
