金融界確實有好多運動健將，年過60嘅中銀保誠行政總裁陳禹昌（Thomas）都非常猛料，上月完成渣打馬拉松全馬賽事，今日就放大假去尼泊爾攀山，仲要係海拔超過6,000米嘅山，果然老當益壯。宅男們真係要學吓佢哋多做運動，提高安多酚，活得開心啲。
挑戰懸崖峭壁
Thomas話，五、六年前開始去尼泊爾攀山，年年都去挑戰自己，今次孖埋太太同兩位朋友一齊去，陳太講明玩埋今年唔再陪佢。佢哋今次行嘅山路，兩邊都係懸崖峭壁，故要請當地嘅攀山高手帶路。
話晒有番咁上下年紀，Thomas承認，之前練跑，試過跑到脫水休克，咁啱冇帶手機，幸獲途人相救。舊年攀山又衰心急而出現高山反應。喲，真係要量力而為呀。