浸大爭李惠利地皮得罪政府，未來恐怕冇乜嘢運行。浸大前校長謝志偉攞隻珍藏歐米茄（OMEGA）金錶出嚟義賣籌款，校友可出價競投，底價40萬元，今個禮拜五截止。籌到嘅錢會透過「第六輪配對補助金計劃」，同政府配對同等金額，用嚟做謝志偉伉儷客座教授計劃。
呢隻錶唔簡單，錶底刻咗三行字，註明隻錶係謝校長71年出任浸大前身浸會學院校長時，教職員集體送畀佢。謝校長話，當時佢月薪都只係得4,000蚊，隻錶應花咗好多同事血汗錢，所以佢一直好珍惜，𠵱家仲行到。
浸大會將隻錶公開展覽，到今年10月尾嘅校友日聯歡晚宴上，就會交畀善長，仲會邀請投得嘅善長成為浸大基金成員。