【影視博覽】陳豪繼以聽不明的港式普通話接受傳媒訪問，被網友瘋傳兼笑爆後，最近網上又再瘋傳陳豪當年在無綫劇《帝女花》飾演崇禎皇帝時，一句「同朕再check下」的對白。陳豪昨以古裝造型出席無綫在香港國際影視展的記者會，重提此事，陳豪笑說：「嗰陣時啲科技冇𠵱家咁發達，朕終於都check咗喇！真係有個check字，當時完全冇人發現，證明朕講呢句說話都好流暢。」
陳茵媺笑唔停
自稱「符碌嘢多到No.1」的陳豪再笑說：「𠵱家要好好check住，𠵱家啲觀眾捉得好緊，我都係最近先聽番呢段聲，真係好爆笑，Aimee（女友陳茵媺）都有笑我，好彩有啲冇出街咋！」
同場還有無綫新劇《金枝慾孽（貳）》、《衝上雲霄II》、《情逆三世緣》、《神探高倫布》、《On Call 36小時II》與及《仁心解碼II》等劇中演員出席，當中以吳鎮宇為首的《衝上雲霄II》氣勢最強，鎮宇見到病癒復工的歐陽震華後亦有上前慰問，事後鎮宇笑說：「我原先以為要鞠（躬）三個，𠵱家只係鞠一個向佢問好。近排都好多朋友發生事，大家都要珍惜身體。」他亦提到近日發生的倫常慘案，他說：「呢啲係社會風氣嘅問題，唔應該賴啲家長。」此外，鄧萃雯亦被問到會否替無綫拍劇，她說：「我唔想為咗謀生而工作，希望做啲想做嘅嘢。」
採訪：卓寶花
攝影：陳順禎
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/