憑電影《低俗喜劇》角逐今年金像獎影帝嘅杜汶澤，近排喜事多籮籮，除咗剛成立製作公司──香港電影，為本土電影發聲外，原來仲用咗1,400萬喺大埔康樂園買咗間洋房自住，不過間屋仔冇老婆份㗎！佢早前曾經透露，計劃買樓同太太田蕊妮努力做人，但連老婆個名都唔加上去，唔知會唔會詐型呢。
雙辣招前 唔講價扑槌
康樂園係明星竇，業主不乏圈中藝人，包括古巨基、陳小春及楊千嬅等。阿澤今次用過千萬買入嘅康樂園洋房，係21街雙號屋，建築面積1,660方呎，實用1,180方呎，另有約1,100方呎花園。土地註冊處資料披露，杜汶澤係喺今年1月底（正式買賣合約日期係1月30日），即政府推出雙辣招打壓樓市前，斥1,400萬元買屋，但層樓就唔見落埋另一半個名。
華華聽促成呢宗交易嘅地產代理講，其實佢哋兩公婆喺大埔都搵咗樓一排，可惜睇極都唔啱水心，包括睇過恒地四叔李兆基發展嘅大埔比華利山別墅，但嫌人哋唔夠實用；查實康樂園實用率都係僅過七成，唔算高，可能貪屋苑私隱度高啩。阿澤喺康樂園大大話話都睇咗十幾個盤，最後扑槌買呢間，係因為價錢係同類放盤最筍。「佢哋都好爽快，見價錢啱，完全冇講價就即睇即買。」
據知，阿澤多年來一直租樓住，包括05年以友情價3萬元租住劉德華嘅加多利山布力架街豪宅單位。
李華華
mailto:[email protected]