社民連梁國雄（圖）早排為咗不滿立法會主席曾鈺成「剪布」，剝奪自己嘅發言權，事件鬧到去高等法院，但上訴被駁回，長毛仲有成百萬訟費未找數，立法會行政及管理委員會噚日開會，表明要繼續追討，唔可以放過長毛。但長毛近來成副心機諗緊佔領中環，對訟費一事都唔太在意。
長毛欠落嘅訟費唔只呢單，3年前新世界因梁展文事件挑戰《立法會（權力及特權）條例》，長毛無跟立法會大隊，自行聘請資深大律師李柱銘做代表，立法會行管會噚日認為，長毛自聘大狀不無道理，幫佢畀訟費唔係冇得傾。長毛就話，馬丁講到其他大狀講唔到嘅觀點，有助釐清立法會嘅憲制問題，所以立法會應該幫佢埋單，聽聞呢兩單訟費加起嚟要近200萬，咪話唔「甘」。