香港這個彈丸之地，竟然接二連三（下筆時，仍有不寒而慄之感）發生倫常慘案。先有兄弟高調發佈父母失蹤消息，媒體網絡隨即跟進廣傳，然後劇情峯迴路轉，小弟涉嫌殺害雙親，且將他們肢解毀屍滅迹。
更叫人毛骨悚然的是，疑犯在接受警方查問期間，仍若無其事向友人發短訊討論案情，如果這是電影橋段（電視尺度應該過唔到），我尚可理解，但一個正常人點先可以活生生砍下自己父母的頭顱？恕我想不下去。而更沒想到的就是，翌日又整多單逆子弒父傷母的悲劇；再來就是一幕殺夫後跳樓、同歸於盡的場面。
有人寫下「我們的城市病得很嚴重」。說的也是，不然怎能解釋這些喪心「病」狂的行徑。而首位病狂（打從心裏，我寧信他真的是因為病發而狂）被人肉搜索一番後，多年前曾在社交網絡留言，當亦成了劇情需要的病徵。他抱怨父母逼他童年學鋼琴，令他失去自由和運動時間，所以身材矮小，且不受異性歡迎……如此原因是否足以觸動殺機，鑄成大錯，我不得而知，他的往生父母縱有來世，睇怕亦唔會明白。
不過對於其他為人父母者，今日將子女的日程排得滿滿，學乜練乜多到不能盡錄，當看到這段新聞時，又該作何想？點都唔係聽日即刻叫佢唔使學琴，又或者打消送佢出國留學的念頭啩。
當然我這說法，又似坊間議論，只是「以果見因」。事實上，常人不能接受的正正就是「非常」行為，或者換句話講，就係一般父母只會期盼子女是他們「有迹可循」的複製產物，所以先會成日將「爹哋媽咪係點點點」掛在嘴邊；頂多再加些少美好投射「將來要比爹哋媽咪更加點點點」。卻沒有幾個會想像子女可能與自己，甚至己所認知的個體都完全不同。所以有一日個仔做咗人傑，同佢成為一個人渣，兩個場景同佢父母嘅養育栽培或都一樣，不過前者自會有人爭住邀功，後者只得無語問叉燒。
人 總有陰暗面
之不過當嚿叉燒冇俾人切成一片片，反將主子斬開一碌碌，我哋都真係唔知可以點算好。罵得再兇再狠，未審且判也是返魂無術，於事無補，而第二日還要再嚟一劑，咁仲可以鬧乜？如果不是要執筆這文，我連翻看新聞內容都唔想，免得自沉心情。
至於所謂事實真相、行兇動機，除了茶餘飯後的話題外，事情至此，再消費無益，亦徒添傷感。如果真的要為這些倫常慘案找個理由，惟信人總有陰暗面，只是藏於內，隱於市，然不知那日何時誤觸「按鈕」，咁啱又黐錯埋條顏色線，仲要連環引爆，咁就……
盧先亞