女人堆最多係乜嘢？梗係是非啦！好似由梁太唐青儀做會長、彭徐美雲做總監，兼夾有何超瓊及唐尤淑圻等做副會長嘅香港女童軍總會，不時傳出爭位消息。最近有傳孫明揚太太鍾小芬夾埋總會「超齡」前總監邊陳之娟，設宴款待有份投票嘅總會成員，仲大派禮物呼籲投票畀何超瓊做下任總監。
八方噚日去到尖沙嘴富豪酒店，確實見到總會搞緊春季晚會，何超瓊亦有到。但原來呢餐飯，係由7個新副會長夾錢搞，同孫太同邊太無關，席間冇獎抽、齋食飯。點解會有流言蜚語？可能因為總會下年真係要改選總監啦。孫太雖然大讚超瓊對總會貢獻良多，但強調絕不牽涉總會改選，否認有心謀朝篡位。