唔聽話嘅仔女，特區真係好多㗎！好似狼振英咁吖，全城叫佢落台，阿爺都繼續死撐，錫住佢唔使步老董後塵，點知噚日佢去到天津訪問，竟然公開違反「習八條」，為規劃館題字，完全唔將習近平「不題字詞」嘅規條放在腦內。阿爺萬分呵護仲要唔聽話，狼振英認真曳曳！
習八條講明唔准提字
新任國家主席習近平去年底接任總書記後，頒佈外界俗稱「習八條」嘅八項規定，以示務實施政，當中一條包括地方領導唔公開出版著作、唔發賀信賀電、唔題字詞。點知阿爺呢個訓令落咗冇耐，狼振英已經違反咗。
話說噚日由北京轉去天津訪問嘅狼振英，上晝參觀咗天津市規劃展覽館。之後就同天津市委書記孫春蘭見面，原來佢哋兩個係老朋友，曾經多次喺香港見面，狼振英仲話知道孫春蘭上任後，已經想第一時間去天津訪問。
可能朝早諗起同老朋友敍舊實在太興奮，加上90年代起任天津市顧問，搞到梁振英忘記習總嘅訓戒，離開規劃館時竟然題字，寫咗「溫故知新，與有榮焉」八個字，寫個「故」字時仲差啲寫錯。睇怕習近平都要向梁振英送上「溫故知新」四隻大字，提佢得閒唔該溫習一下「習八條」。
mailto:[email protected]