習主席喜歡講土口號，「打鐵還需自身硬」、「眾人拾柴火焰高」，有地道特色，又形象化，成為佢個人風格。佢會見振英都算唔客氣，頭兩句表面讚穩中求變得市民支持，但一轉口氣表示關鍵在於抓緊落實，要團結各界，送上一句「眾人拾柴火焰高」畀振英。上文下理睇晒，即係公開批評梁振英穩中求變只係得把口，至今無力落實，執行力成疑，而原因係冇團結香港各界。
梁營親疏有別 自我削弱
國家領導禮節性會見港澳特首，通常都會公開鼓勵肯定幾句，講話多係要求把握機遇，應對挑戰等口號。今次對梁振英作針對性訓話，比較少見，而且一矢中的。對習近平而言，梁並非他親手培植自己人，只不過在當時狙擊唐唐成功製造亂局後，中央被動地支持梁做特首而已。至於幕後協助梁振英「計算」中央，背後支持勢力，相信習近平已知道來龍去脈。
梁當選後，中央要穩住局面，先調走中聯辦主任彭清華及副主任李剛，改派港澳辦廖暉一系人馬副主任張曉明出掌中聯辦，再通過政協任命拉住本應失勢的唐系人馬，意圖消減建制內部分裂。
但一邊廂中央努力鞏固特區政府政治支持基礎，另一邊廂梁營人馬卻大搞親疏有別，利用公職委任分發予梁粉，叫高靜芝向政策局局長奪權，將政治酬庸分派工作集中在梁粉手上。大半年下來，結果特區政府越來越孤立，政策出台，除負責之司局長外，外圍專業人士、學者、意見領袖一概抵制，拒絕為政策背書站台。只有財政司司長曾俊華一人，毋須靠梁粉小圈子助拳，而有街外人支持。
造成如此困局，即使梁振英IQ爆棚，施政報告曉飛，都冇足夠政治力量去推行變革。呢種自我削弱，源自梁營人馬大權在握後，仍然當自己少數派，充滿鬥爭意識，敵視其他建制勢力。
泛民內亂，根本無力發動群眾去對付梁振英，而梁剛愎自用，梁粉亦非大氣之人，多年來被排擠在主流建制之外，各人走埋一齊變了小圈子政府，負能量沖天，神經兮兮仲以為自己日日被迫害，走唔番出嚟做個正常人。
官僚集團則低調被動，任由梁粉亂噏亂搞，師老無功。林鄭愛惜自己羽毛，唔再輕易公開表態撐特首。過往曾蔭權年代，但凡施政報告後，林鄭總係第一個搶韁出嚟講解政策及發展大計，𠵱家升官之後，反而低調收埋唔出聲，行政會議政客林煥光仲多聲氣過佢。
新政府上場大半年，內外都冇辦法團結，穩中求變成「搵丁」求變，眾人拾柴當然火焰高，只不過柴火上是被烤的梁振英而已，而有份將柴枝拋入火堆者，又何止泛民中人。
添馬男