承接上期，計及樓價因素之後，中港股市估值相對美股，優勢唔算明顯。而美股目前嘅市賬率（PB）亦已經去到金融海嘯以嚟高位，咁係咪證明美股就快見頂，要走頭？晉佳覺得又未必，市賬率破位，正正反映市場睇法，晉佳認為有兩大可能性：（一）基本因素出現突破性好轉；（二）當地樓價見底回升，令資產負債表內嘅資產價格出現上升預期。晉佳覺得，因素（二）機會較大。
觀察番標普500指數市賬率走勢，就發現喺科網股爆破之前嘅增長期，市賬率可以升到去最高5倍樓上，認真誇張；03年後就喺2.5至3倍之間徘徊，反映增長能力已經打折扣。去到08年金融海嘯後，美國經濟今非昔比，金融股跌到阿媽都唔認得，標指嘅市賬率最多去到2.3倍左右，即係現水平。
盈利預測尚未反映
喺美國樓市一潭死水、經濟半生不死嘅情況下，美股市賬率頂盡去到2.3倍，如能成功破位，有可能反映上述其中一個因素出現轉機。如果投資者有信心樓價上升能夠推郁資產價格，賬面值就能夠上升，喺同一嘅市賬率之下，股價就會同步上升。
其實無論係情況（一）定（二），一批美國出口股照計仲有運行。業務同美國樓市掛鈎嘅創科實業（669），可以列為首選，以券商平均預測2012年市盈率19.7倍、2013年15.5倍嚟計，估值絕對唔貴，變番增長股嘅話，2012年市盈率上番去22倍甚至更高，理應冇乜難度。再者，美國樓市復蘇預期尚未反映喺創科今明兩年盈利預測之上，意味創科股價可以有相當唔錯嘅上升空間。
晉佳喺本欄已經推介過創科好幾次，呢間公司主要做工業用同建築裝修用嘅電動工具，佢有一個好處就係幾年前做過重組，業績前年已經回復增長，而睇番近10年業績，除咗重組期間之外，都能夠交到靚數，睇得出公司有競爭力，買佢應該點都好過買江河日下嘅利豐（494）啩。
晉佳
本欄逢周一、三及五刊出