有一位供應商向某餐廳供應食油、紅酒白酒等等，幾個月下來，應收賬款累積到三萬元左右，餐廳從未找數。供應商一早查冊（好彩還有得查，將來唔知點），知道餐廳控股公司係ABC，主席係X大文，打電話去ABC搵X大文，先知道ABC已經不存，X大文先生不在港。供應商於是立即去搵餐廳，咦，招牌依舊，正常營業，打開門做緊生意噃，梗係走入去收數啦，見到成班夥計依舊在，只是換了新老闆，叫做Y小武。Y小武話：「你條數係舊老闆嘅，關我乜事呀，你去追X大文啦。」係唔肯找數。
供應商立即循小額錢債裁判庭追索。Y小武對法官話：「X大文間公司同我間公司唔同，冇理由要我找數。」但法官根據事實，餐廳招牌照舊，夥計照舊，門面裝修照舊，地址照舊，判決實質生意全無變動，供應商有權追貨款，判Y小武敗訴，餐廳不能因為控股公司改變，老闆改變就可以走數。
餐廳R聽到呢件案件之後，認為法官判得啱，否則嘅話，漏洞就多咯，例如餐廳R有某間餐廳做唔掂，就將間餐廳經營權以一蚊轉讓咗俾左丁山（老友記），改埋公司名，咁就前事不理，餐廳唔駛找舊數？天下點可以有如此便宜之事。
梗係唔得啦，過往用BVI（英屬處女島）公司買樓，然後賣樓，辦法係透過買賣公司控股權，可以慳番樓宇買賣印花稅（有咗SSD、BSD之後，此路不再暢通），但買公司嘅買家須接受一個風險，就是不知道涉及嘅公司是否孭咗一批債務，故此買賣公司嘅協議文件內，必有一啲條款，要賣方保證將來如有人追討公司債務，而呢啲債務係買賣談判時沒有披露，買方唔知嘅，賣方須負責任。餐廳R亦講到：「小額錢債最好上小額錢債法庭追討，如果叻唔切，以為自己識法律，引用保護債權人條例索償，裁判官就會將案件轉介地區法院審理，法律費用立即狂升，三十萬元怕走唔甩，追到三萬而用咗律師費三十萬，就係其蠢無比。」