做生意最緊要有「協同效益」，一加一要大過二，但點為之理想嘅協同效益呢？唔同人有唔同睇法嘅。好似新世界中國（917）同周大福（1929）咁，就發現賣樓同賣金之間，存在好大嘅合作空間。
5億生意益周大福
呢兩間同為新世界系嘅公司，噚日公佈咗一個持續關連協議，簽訂為期三年嘅採購定單，新中每年可向周大福買入黃金產品同禮券，喺賣樓時做贈品，送畀物業買家。周大福由今個年度起三年，每年可以同新中處理嘅交易上限分別係3,580萬、1.96億及2.67億元，合共大約係5億，以周大福現時一年銷售額超過500億嚟講，濕濕碎啫。
賣樓送黃金都畀純官諗到，華華都想獻計，建議純官早日收返隻佐丹奴（709）自己打理，到時可以同周大福再crossover，搞賣金送T恤，話唔定又有協同效應喎！