正所謂「人怕出名豬怕肥」，皇家馬德里嘅前鋒基斯坦奴朗拿度（C朗）貴為世界數一數二球星，但係衣着品味一向麻麻；好似周一佢着到靚靚仔仔出席《馬卡報》嘅上季最佳頒獎禮，攞代表上季最佳球員嘅「迪史堤芬奴獎」，髮型同衣着又畀英國傳媒抽秤。
皮帶戴兩次被彈慳家
C朗3月頭歐聯作客曼聯，着住對白短褲白長襪白波鞋，畀英國傳媒取笑佢小學雞；今次出席頒獎禮，當然盛裝出席，可惜都係失手而回。C朗身穿白恤衫、紫紅色西裝外套，加一條洗水牛仔褲，簡單得嚟又隆重，應該冇咩問題。不過愛髮如命嘅C朗，新髮型又被英國傳媒取笑；事關C朗呢期唔再玩蛋撻頭，改再雞冠look，其實清清爽爽，足球員都ok；但佢右邊鏟條界出嚟，早幾年AC米蘭門將迪達都玩過啦，C朗𠵱家先跟就有啲out。另外，英國傳媒嘅記性出奇咁好，C朗戴住條G字頭名牌皮帶，原來月初同女友艾琳娜出街時都帶過，慳家都俾人拎嚟做笑柄。
膺上季西甲最佳球員
點都好，C朗今次喺西班牙《馬卡報》主辦嘅上季西甲最佳頒獎禮中，拎到最佳球員，以自己個命嚟命名嘅迪史堤芬奴，更加親自頒獎；面對皇馬名宿，C朗亦都好謙虛咁講：「攞獎已經好開心，從迪史堤芬奴手上拎獎，就更加大榮譽；我希望藉此多謝所有支持我嘅人。」同日好多得獎者都有現身拎獎，好似巴塞門將域陀華迪斯，當選上季最佳門將；馬體會前鋒法卡奧，就拎歐霸盃金靴獎；不過拎最佳射手嘅美斯，就因為返咗阿根廷備戰世界盃外圍賽冇出現，由巴塞新聞官代為攞獎。