新任總理李克強提出三不政策，奢侈品成為打壓對象之一，名車名酒股近期顯著受壓。月初通過收購國藏酒莊嘅華藝礦業（559）逆市企硬，值得望多兩眼。
華藝將取得五糧液中國經銷權及五糧液釀神系列酒中國獨家經銷權，點解賣貴酒股價依然硬淨？原因之一，係市傳集團構思推出平價惠民酒，定價僅100蚊人仔，並會透過環保電動車作流動銷售平台，唔排除會獲得國家補貼，可謂食正慳憸及環保兩大概念。集團計劃三年內將店舖增至3,000家，銳意成為行業龍頭之一，現時專賣店達364間，遍佈全國18省，網絡優勢十足。截至去年底，華藝半年虧損1.2億銀，主要因為股份付款開支及認股權證公平值變動所致。事實上，收購國藏酒莊有溢利保證，今年盈利肯定不少於5,000萬人仔，配合大小通吃政策，扭虧只係時間問題。早前大升後以旗形整固，現價0.455元吸納，短線博破旗而上，潛在升幅一成，跌穿0.43元止蝕。
唐牛