舊年市況麻麻地，「篋神」新秀麗（Samsonite，1910）核心盈利仲有超過兩成增長，主席兼CEO Tim Parker（圖中）都話非常滿意。佢分享秘訣時就話，雖然公司係全球品牌，但就成功做到本地化，產品能因應市場度身訂做。例如公司特登開咗條casual line叫Samsonite Red，專攻年輕市場。
華華見新秀麗早排嘅大中華區廣告代言人，係熟男影帝陳道明；但一去到韓國，代言人就變咗做韓妹最冧嘅花美男宋仲基。宋仲基舊年憑韓劇《善良的男人》同電影《狼族少年》人氣勁升，仲成為當地「廣告身價急升藝人」，佢以358萬港元身價，僅次於馬舞大叔PSY排第二位，聽講已經有15個廣告喺手。篋神都認真識揀。