方濟剛就任教宗，同樣來自阿根廷嘅迪史堤芬奴就自爆同新教宗有淵源；86歲嘅迪史堤芬奴喺《馬卡報》個人專欄自爆，自己同方濟曾經喺布宜諾斯艾利斯一間中學做校友，自己個姐姐嘅屋企，同方濟嘅故居好近，仲話如果方濟細個時到街頭踢波，好大機會就同佢老人家交過手。
因足球入教
不過講番足球，迪史堤芬奴就自豪得多，佢話當時自己已經入咗河床嘅青年軍，喺當地好有名氣，反而就記唔起有冇同方濟交過手咁話喎。
本身亦都係天主教徒嘅迪史堤芬奴，亦都自爆因為足球先入教；話說當年迪史堤芬奴同一班朋友喺街邊踢波，結果一次唔小心將個波踢咗入修道院，迪史堤芬奴膽粗粗爬入去執波，結果畀個修女捉住，修女當時同佢講：「還番個波畀你都得，不過你下次就要嚟食聖餐。」結果迪史堤芬奴就係咁樣就入教嘞！