時代轉變，過往不少男性主導的職業，今日都要跟女生平分春色。
其中廿年前仍是全男班的消防處，今日已經擁有十名隊長級及區長級的女消防。
要在一眾純陽剛的男人堆中突圍，除了有「人哋食飯，我加操」的勤力，更要識食腦溝通，「消防工作要求男女一樣，機會人人平等，帶咗頭盔，邊個知你係女人呀！」每日面對著全男班工作的助理消防區長Madam Wu(胡麗芳)說。
記者：羅鈺歡 攝影：陳家紹
消防工作一向以男性主導，而且階級觀念比較重，要老隊目聽命於女上司，有一定難度。
Madam Wu表示，性別之外，男女消防隊長的工作及事業發展一模一樣。「我都係紅褲仔出身，同樣要經過前線行動組滅火救援工作，一樣要提升自己技能和體能。唔會因為你細粒過人，而造條細碼消防喉俾你，所以女消防隊長比男性付出更多努力。」
「我評估隊員能力的同時，佢哋同樣評估緊我作為消防隊長的能力，而且帶住頭盔上火場救人，根本冇人會理你係男定女。」她說，當下屬見自己一樣落手落腳去救人時，就自然會諗「呢個madam唔係齋Talk！」
體力不輸給隊友，她還不時發揮自己的女性優勢，「記得有個企跳case，個女仔因前一晚同阿媽鬧交，在廿幾樓住所反鎖自己出窗外。為咗打開話題，扣好安全帶的我用右手扣著窗花，支撐著半邊身懸掛窗外同佢傾偈『喂，見過女仔做消防未呀？』女仔真係好好奇咁望吓我，大約傾咗個幾鐘，隊員上下夾攻將佢送返入屋，最後我就搞到全身麻痺自行爬返入屋。」
新官難免備受挑戰
同樣管理一班鐵男的林素華，現任防火組高級消防隊長，坦言初時要臣服下屬有困難：「年輕隊員唔難接受我，反而係經驗多的老隊目會覺得『我做消防嗰陣你仲著緊片咋，你讀多兩年書之嘛，憑咩帶住我哋？』他們突然被個𡃁妹head住，的確需要時間適應和磨合。」
不過經過不斷合作，她終於得到一班男下屬的信任。「我在上環局做隊長時，支援一單中環凌晨三級火，當時我剛出道兩年，同行的資深隊目好勇敢咁想穿過雜物入火場救人，但我一手拉住佢衫尾，唔俾佢入去，雖然個刻佢猶疑過，最後都聽我講搬開啲嘢救人。我身為隊長一定要保護下屬安全，萬一雜物倒塌就返唔到出嚟。」
在這次事件中，她感受到隊員對她開始產生信任，亦反映出能力和理智絕非單靠年資可累積得來的。她說要有勇氣接受挑戰，別人才會信服。
用智用力統領一班男人，她更不忘自己女性天職，目前已是兩子之母的Madam Lam「兩次生仔都係開刀，產後三個月已經要上跑步機急步跑，要逐漸鍛煉返啲肌肉，先有力搬工具。人哋一星期操一日，我就要隔日操。」
「消防員有個習慣，每當任何新同事上任，班舊人都會先測試對方料子有幾多，例如睇自己有冇膽身先事卒做高空拯救，又或者處理殘肢等工作。」相比之下，有時女上司更好過男上司。曾經與三名女消防隊長共事的消防處職工總會副主席謝守龍就承認，通常男性容易接受女性的說話，所以男同事對著女隊長時，反而會先抑制不滿，聽完女上司說話才作出回應，無形中就可以緩和了不少衝突 。
