現年35歲嘅高皓正係基督徒，多得鄭秀文翻唱佢首《不要驚動愛情》而為人認識，高皓正為咗傳教可謂不遺餘力。近日佢喺facebook發功，先後寫咗兩篇超長文章，分別係「10個不婚前性行為的理由」同「脫離自瀆小帖（貼）士」，當中佢列舉唔婚前性行為嘅10個好處，包括令自信心大增、令對方父母歡喜、唔會怕有咗等，好似有根有據，不過都唔夠佢講脫離自瀆夠學術性，佢從生理、心理同屬靈三方面分析，唔知仲以為佢做咗心理醫生。
被轟製造強姦犯
高皓正發佈文章後，惹嚟網民狂轟，有網民笑佢係高主教，又話佢「變左諾貝爾文學獎得主……莫言……」，有人仲鬧佢偽善同缺乏性知識，仲有網民話佢叫人唔自瀆會好易製造更多強姦犯。
不過高皓正噚日接受電話訪問強調唔會唔開心，佢話：「叫人小心發生性行為，亂拍拖上床好危險同有後果，自己有睇網民留言，希望有需要嘅人睇就得，我唔信咁講就會有咁大能力（製造強姦犯）。」
撰文：馮仁昭
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/