塞浦路斯史無前例打算向銀行存戶徵稅，好哋哋放喺銀行嘅錢，一夜之間可以被政府攞走一截，小存戶同俾政府打劫基本上冇分別。
不過，受塞浦路斯「自殘」事件影響嘅，其實仲有一班強國人。話說近半年有唔少強國人，為本歐盟護照攻陷塞浦路斯。因為只要閣下於塞國投資30萬歐元地產，同埋放3萬歐元喺銀行，唔單止可成為當地永久居民，而且一本歐盟護照即時揸手。
錢，強國人大把，但有護照，既方便歐遊，仔女亦易入歐洲名校，更可避「一孩政策」，何樂而不為？嗱……塞國係喺上年8月先釐清入籍條件，咁當然成功吸引唔少人落叠，仲令當地樓市於去年反彈15%。
錢就收齊嘞，存款亦到位，呢個時候至話你聽計劃收稅。情況有如一隻股俾莊家炒起後，散戶追入，點之突然戲劇性宣佈供股，夾硬俾人抽水一樣。所以話邊有咁大隻蛤乸隨街跳，貪着數去歐豬投資，真係分分鐘變「水魚」。
Fifi
本欄逢周二、四刊出