徇眾要求，為親愛的讀者解構〈自作自受？〉一文中，那位「寶貝」是如何打造出來的；再揭開謎底，那兩老是如何為自己「善後」的。
寶貝雖不是生於帝皇之家，但雙親自小待他如皇上一樣，捧在掌心中養大。填鴨式教育太辛苦，寶貝阿爸是公務員，本來去英國最正路又免費，不過天氣又濕又凍，寧願自費送寶貝去風光明媚氣候怡人的澳洲。除了供書教學，誓要寶貝豐衣足食，出入自然要有私家車代步，寶貝話買新車德國「奔馳」性能好最安全，馬上「科水」冇問題。住不到一個月，嫌宿舍又投訴膳食，話要立即搬，兩老即時請假飛去幫寶貝揀地方兼畀錢。
學成歸來投身職場，份份工都壓力大又辛苦，還要頭頭碰着黑，個個老闆上司都係使人唔使本嘅衰人。想收買人命咩？肉赤死兩老，慌忙叫寶貝咪鬼做！搵得雞碎咁多，兩老不愁衣食，反正他日全部留給最愛的寶貝一人，只要寶貝開心，於願足矣。話寶貝知毋須要靠運氣中六合彩，保證不用擔心生活，兩老早已預備。於是乎這十幾年來，三分一時間在找或者試工，三分二時間賦閒在家，衣食住行統統兩老孭起，只擔心寶貝幾時成家立室開枝散葉。難得寶貝遇到意中人，只要寶貝肯結婚，慷慨激昂開出六星級酒店婚宴歐洲蜜月全包宴，再加「大」六位數字女家禮金。
豈料婚禮還未舉行，寶貝失驚無神話要兩老搵屋搬以騰出地方，晴天霹靂嚇得呆在當場，不過沒有心臟病發。寶貝請飲茶十年唔逢一閏，還不仆倒去？只着急又擔心不知臨時臨急樓上樓下有冇單位賣，必要時租一個來住都要，怎可丟低寶貝不理，實在太不負責任了！求仁得仁，得！
張慧敏
http://www.facebook.com/HKcareerdoctor